जिल्ला अस्पताल बाजुराबाट एकैदिन ४६४ जनाले लिए स्वास्थ्य सेवा, ओपीडीदेखि शल्यक्रिया सम्म सेवा प्रवाह
बाजुरा: जिल्ला अस्पताल बाजुराले एकैदिन ४६४ जनालाई विभिन्न स्वास्थ्य सेवा प्रदान गरेको छ। अस्पतालले सार्वजनिक गरेको २०८३ साल असोज १३ गतेको दैनिक सेवा प्रवाह विवरणअनुसार अस्पतालबाट बहिरंग सेवा, आकस्मिक उपचार, भर्ना, प्रयोगशाला परीक्षण, एक्स–रे, औषधि वितरण तथा शल्यक्रियालगायतका सेवा प्रदान गरिएको हो।
अस्पतालको विवरणअनुसार उक्त दिन ८० जनाले मुलदर्ता गराएका छन्। तीमध्ये ३१ जना स्वास्थ्य बिमामार्फत र ४९ जना सामान्य सेवाअन्तर्गत दर्ता भएका छन्। त्यस्तै, ओपीडी सेवामार्फत ६३ जनाले सेवा लिएका छन्। आकस्मिक सेवा कक्षमा १५ जना बिरामी आएका छन्। तीमध्ये ४ जना भर्ना भएका छन् भने २ जनालाई अन्यत्र रेफर गरिएको विवरणमा उल्लेख छ। अस्पतालको अन्तरंग सेवाअन्तर्गत १३ जना बिरामी भर्ना भएका छन् भने ४ जना डिस्चार्ज भएका छन्।
त्यसैगरी, अस्पतालको फार्मेसीबाट १०६ जनाले औषधि सेवा लिएका छन्। तीमध्ये ३० जना स्वास्थ्य बिमामार्फत र ७६ जनाले सामान्य प्रक्रियाबाट सेवा लिएका छन्। प्रयोगशाला सेवाअन्तर्गत ४१ जनाले सेवा लिएका छन् भने एक्स–रे सेवाबाट ३३ जना र भिडियो एक्स–रेबाट १८ जना लाभान्वित भएका छन्। त्यस्तै, ईसीजी सेवा ९ जना, दन्त सेवाबाट १३ जना, एकद्वार संकट व्यवस्थापन केन्द्र (ओसीएमसी) बाट ५ जना तथा पोषण पुनर्स्थापना केन्द्रबाट १ जनाले सेवा लिएका छन्।
अस्पतालको अपरेसन थिएटर (ओटी) मार्फत ९ वटा प्रक्रिया सञ्चालन भएका छन्। त्यस्तै, निःशुल्क औषधि वितरण सेवाबाट ३१ जनाले सेवा पाएका छन्। प्रसूति तथा एसएनसीयू सेवाअन्तर्गत पनि बिरामीलाई सेवा प्रदान गरिएको अस्पतालको तथ्यांकमा उल्लेख छ।
अस्पतालले सार्वजनिक गरेको तथ्यांकले जिल्ला अस्पताल बाजुराबाट एकैदिन विभिन्न प्रकृतिका स्वास्थ्य सेवाहरू सञ्चालन भइरहेको देखाएको छ। दुर्गम जिल्लाका नागरिकलाई स्थानीय स्तरमै स्वास्थ्य उपचार उपलब्ध गराउने उद्देश्यले अस्पतालले बहुविध स्वास्थ्य सेवा प्रवाह गर्दै आएको छ। अस्पतालको विवरणअनुसार उक्त दिन प्रदान गरिएका विभिन्न सेवाको कुल संख्या ४६४ रहेको छ।
